REAL ESTATE PORTAL

VIJANA GEUZENI CHANGAMOTO KUWA FURSA..,

Diana Isaya akipokea cheti kutoka kwa Meneja wa huduma kwa jamii, Hawa Bayumi baada ya kuhudhuria mafunzo ya ujasiriamali yaliyoendeshwa na kampuni ya simu za mkononi ya Airtel, Dar Live Dar es Salaam. Kulia ni Meneja mauzo wa Airtel, Fadhili Mwasyebya na mkufunzi wa mafunzo hayo Allen Mwangwele.

VIJANA wametakiwa kuzigeuza changamoto zilizopo kwenye maeneo yao kwa kuzifanya kuwa fursa kwao na kujiajiri badala ya kusubiri kuajiriwa na kubaki wakilalamika kuwa hakuna ajira...,

Pamoja na fursa hizo vijana pia wametakiwa kuitumia mitandao ya kijamii kutengeneza mifumo ya kibiashara kwa kubadilishana mawazo badala ya kutumia muda mwingi mitandaoni kujadili mambo yasiyo na tija.
Rai hiyo ilitolewa jana na Meneja wa Huduma za Kijamii wa kampuni ya simu za mkononi ya Airtel, Hawa Bayumi katika semina ya Airtel Fursa Tunakuwezesha inayotolewa Dar es Salaam kwa vijana wenye umri wa kati ya miaka 18 na 24 ili kuwajengea uwezo wa kujitegemea.

Alisema lengo la semina ni kuwapatia vijana waishio Dar es Salaam mafunzo ya biashara ya ujasiriamali kuweza kumudu uendeshaji biashara zao na mahitaji yao. Bayumi alisema: “Tumeamua kulenga kundi la vijana hawa kutokana na nguvu ya kundi hilo ambalo linauwezo wa kuleta mabadiliko makubwa kiuchumi iwapo litawezeshwa kupata elimu ya ujasiriamali”.

Mmoja wa wanufaika mjasiriamali Diana Isaya alisema kuwa amepata muongozo mzuri utakaokuza biashara zake na kuzifanya kwa weledi mkubwa zaidi. “Napenda kuwahimiza vijana wenzangu kuandaa mawazo ya biashara bila kusubiri kuwa na fedha ndiyo waanze kujipanga na kuchangamkia fursa zilizopo kwenye maeneo yao,” alisema Isaya.

Tangu kuanza kwa mafunzo hayo ya ujasiriamali kwa vijana, zaidi ya mikoa 10 imefikiwa ambapo vijana wengi wamenufaika na mpango huo na kuanzisha ama kuendeleza biashara zao.

SIMBA BADO WAJIVUTA OFA YA DEWJI..,

WAKATI mdau wa Simba, Mohamed Dewji akionesha nia ya kutaka kuwekeza katika klabu hiyo kwa Sh bilioni 20, uongozi wa Simba bado unajivuta kutoa maamuzi huku ukiweka mambo sawa kuwa timu hiyo haiuzwi...,

Dewji alitangaza kwenye chombo kimoja cha habari kuwa siku ya leo itakuwa ni mwisho akiutaka uongozi wa Simba kutoa majibu, kama yeye aweza kufanya uwekezaji huo na kuanza mara moja utekelezaji wa mikakati yake kuanzia Januari mwakani.

Akijibu maswali ya waandishi wa habari juzi, msemaji wa Simba, Haji Manara alisema uongozi wa klabu hiyo haupingi uendeshaji wa klabu katika mfumo wa kisasa isipokuwa wanahitaji kuwa makini.
“Hakuna taasisi, mtu, kikundi aliyeleta barua kutaka kuinunua Simba mpaka hivi sasa, hatuna. Ni suala ambalo wanachama wanahitaji kuelimishwa kwanza kabla ya kuingia huko,”alisema.

Kwa mujibu wa taarifa za Dewji, anataka kuwekeza katika klabu hiyo kwa nia ya kuiendesha kibiashara.
Alisema alikutana na viongozi wa Simba, Rais Evans Aveva akiwa na Kassim Dewji na Musley Ruhwehi na kuwaeleza dhamira yake lakini anaona viongozi hao hawako tayari.

Pia, alisema iwapo ataruhusiwa kufanya uwekezaji huo atajenga kiwanja cha Bunju na kuwa kiwanja maalum cha mazoezi ya klabu hiyo na pia kama kituo maalum cha kulea vipaji vya soka kwa vijana ambao baadaye watachezea timu hiyo.

Dewji alisema iwapo leo halitatoka jibu kuwa uwekezaji huo ataachana nao na kuendelea na shughuli zake.
Hata hivyo, Rais wa Simba Aveva hivi karibuni alisema suala hilo haliwezi kuamuliwa haraka, kuna mchakato wa kupitia katiba na kufanyia marekebisho lakini pia kuwahusisha wanachama kwenye mkutano mkuu kisha waridhie ndipo jibu liweze kutoka.

OBAMA ATAWASILI HANNOVER MWEZI APRILI

Rais Barack Obama wa Marekani amepanga kuitembelea rasmi Ujerumani mwishoni mwa mwezi wa April mwakani.Kwa mujibu wa ikulu ya Marekani mjini Washington, rais Obama atakutana mjini Berlin na kansela Merkel na kuwa rais wa kwanza wa Marekani kutembelea maonyesho makubwa kabisa ya kimataifa ya viwanda mjini Hannover, kaskazini mwa Ujerumani...,

Duru za Marekani zinasema rais Obama ataitumia ziara yake nchini Ujerumani kutetea makubaliano ya biashara huru kati ya Umoja wa Ulaya na Marekani-TTIP. Rais Barack Obama amedhamiria kutia saini makubaliano hayo,kabla ya mhula wake kumalizika mwaka 2017-makubaliano yatakayoanzisha kanda mojawapo kubwa kabisa ya biashara huru ulimwenguni.

Wengi wa wakaazi wa pande mbili za bahari ya Atlantik wanahofia makubaliano hayo yakitiwa saini vizuizi vya forodha vitaondolewa na kuzidishiwa nguvu na makampuni makubwa makubwa dhidi ya yale ya ndani pamoja na kukiukwa taasisi za kidemokrasi.

KIONGOZI WA WANAMGAMBO YEMEN AUAWA

~~YEMEN~~
Kiongozi wa wanamgambo wanaopigana nchini Yemen, Ahmed al-Idrisi, ameuawa kwa kupigwa risasi na watu wasiojulikana wakati akiwa safarini na wenzake wengine wanne maeneo ya kusini mwa mji wa Aden...,

Washambuliaji waliokuwa ndani ya gari na wengine juu ya Vifaru waliufyatulia risasi msafara huo na kumuua Ahmed al-Idrisi, kamanda wa ngazi ya juu wa kundi la upinzani linalounga mkono upande wa serikali,
Wakati wakiwa safarini katika barabara kuu ya wilaya ya Mansoura siku ya Jumatano.
Tukio hilo limekuja siku chache baada ya kuuliwa kwa hakimu maarufu katika barabara hiyo hiyo. Kwa mujibu wa madaktari, Hakimu muandamizi wa mji wa Aden, Jalal Abdullah, aliuliwa katika wilaya ya Mansoura Jumanne, masaa machache baada ya bomu kulipuliwa karibu na makao makuu ya chama cha Islah Islamist, na kujeruhi mtu mwingine mmoja. Hali hii imesababisha machafuko ya usalama katika mji ambao ndio makao makuu ya muda ya serikali ya nchi hiyo. Hadi sasa hakuna aliyejitokeza kuhusika na mashambulizi hayo.

Mashambulizi yakiendelea katika mji wa Aden,

Katika miezi ya karibuni, mji wa kusini wa Aden umekuwa ukishuhudia msururu wa mashambulizi yanayowalenga wale wanaomuunga mkono Rais Abd-Rabu Mansour Hadi, ambaye serikali yake ina makao yake makuu mjini humo.

Wanamgambo wa kundi la Idrisi ni washirika wakuu wa muungano wa nchi za kiarabu ambao umekuwa ukilishambulia kwa mabomu kundi la waasi la Houthi linaungwa mkono na Iran, na lenye ngome yake katika mji wa Sanaa, kaskazini mwa Yemen.
Ushirikiano huwo uliingilia kati vita hivyo vya wenyewe kwa wenyewe tarehe 26 Machi na kuiunga mkono serikali ya rais Hadi.

Halikadhalika katika mji mwengine wa Taiz madaktari wameandamana baada ya hospitali moja kukataa kupokea wagonjwa wa ziada kutokana na kuwa na uhaba wa dawa, huku mapigano yakiwa yanaendelea mjini humo baina ya waasi wa Kihouthi na wanamgambo wanaunga mkono upande wa serikali.
Takriban watu 6,000 wameshauawa kutokana na mgogoro huwo na ingawa wanamgambo wa kusini mwa Yemen pamoja na vikosi vya muungano wa nchi za kiarabu waliwaondoa Wahouthi nje ya mji wa Aden Julai na kumuwezesha Rais Hadi kurudi tena, mapigano bado yamekuwa yakiendelea huku suluhisho la kidemokrasia likiwa bado halijapatikana.

MAREKANI YAWAKINGIA KIFUA WAANDISHI WA HABARI

Ikulu ya Marekani imeitaka Ethiopia iache kuitumia sheria inayotatanisha ya kupambana na ugaidi kama kisingizio cha kuwatia jela waandishi habari....,

Msemaji wa baraza la usalama wa taifa Ned Price hakuwataja waandishi habari hao waliotiwa ndani-hata hivyo ripoti yake imefuatia msako mkubwa wa Ethiopia dhidi ya wapinzani. Msemaji wa baraza la usalama wa taifa-Ned Price alisema,

"Tumeingiwa na wasi wasi mkubwa kutokana na kukamatwa waandishi habari wengine nchini Ethiopia."

Ikulu ya Marekani imeihimiza Ethiopia iwaachie huru waandishi wa habari hao na watu wengine waliofungwa kwasababu ya kutumia uhuru wao wa kujieleza.

Serikali ya Marekani imeitaka pia serikali ya Ethiopia-mshirika wake mkubwa barani Afrikla, iache kuitumia sheria ya kupambana na ugaidi kama chombo cha kuwanyamazisha wapinzani. Serikali ya mjini Addis Ababa imetakiwa ilinde haki za waandishi habari,wanablogi na wapinzani za kuandika na kuzungumza bila ya kipingamizi.

MSHUKIWA UGAIDI AKAMATWA UBELGIJI

Mtu mmoja amekamatwa katika msako kwenye mji mkuu wa Ubeligiji-Brussels na kuifanya idadi ya wanaoshikiliwa nchini humo kuhusiana na mashambulizi ya kigaidi mjini Paris kufikia watu 10. Mashambulizi hayo ya mwezi Novemba yaliwauwa watu 130...,

Mtu huyo aliyekamatwa mwenye umri wa miaka 22 ametajwa kwa jina la Ayoub B, na amefunguliwa mashtaka ya ugaidi pamoja na kushiriki katika maandalizi ya ugaidi. wawili kati ya waliohusika na mashambulizi ya mabomu ya kujitoa mhanga nchini Paris, Brahim Abdesalam na Bilal Hadfi wakiishi Ubeligiji.

HIVI NDIVYO SPIKA JOB NGUNGAI ALIVYOREJEA NYUMBANI

71 MBARONI KWA UHALIFU DAR

IGP Ernest Magu

~~DAR ES SALAAM~~

JESHI la Polisi Kanda Maalumu ya Dar es Salaam, limesema limewakamata watu 71, silaha nne na dawa za kulevya katika oparesheni ya mwishoni mwa mwaka. Akizungumza na waandishi wa habari Dar es Salaam jana, Kamishna wa Polisi Kanda hiyo, Suleiman Kova alisema Desemba 24 mwaka huu, maeneo ya Ubungo Kibo, Kinondoni, Polisi walipata taarifa kutoka kwa mwananchi ambapo walifanikiwa kumkamata mfanyabiashara, Peter Massawe (25).......

Kova alisema Massawe ni mfanyabiashara wa duka la nguo na mkazi wa Ubungo Rombo alikutwa na bastola aina ya Taurus, yenye namba 801340 iliyotengenezwa nchini Brazil ikiwa na risasi mbili na maganda ya risasi matatu.
Kwa mujibu wa Kova, mtuhumiwa alipohojiwa alidai kuwa silaha hiyo ililetwa na Ismail Mcharo (29), dereva wa bodaboda, mkazi wa Kimara Kilungule kwa ajili ya hifadhi baada ya kuitumia katika tukio la uporaji lililotokea maeneo ya Selander Bridge.

Pia alisema watuhumiwa wengine waliokamatwa ni Matola Rashid (30) muuza mkaa na mkazi wa Kimara Baruti na Fitina Ramadhan (43) mkazi wa Magomeni. ‘’Mahojiano hayo pia yalisaidia kupatikana kwa silaha nyingine ambazo ni shotgun mbili, bastola moja, pikipiki tatu na simu mbili za mkononi,’’ alisema Kova.

Alisema watuhumiwa wanahojiwa na kwamba upelelezi wa shauri hilo utakapokamilika jalada la kesi litapelekwa kwa mwanasheria wa serikali ili sheria ichukue mkondo wake. Alifafanua kuwa jeshi hilo linaendelea kukabiliana na athari za dawa za kulevya ambapo jumla ya watuhumiwa 68 ambao ni wasambazaji wa dawa hizo, walikamatwa.

Aidha, wamekamata magunia manne ya bangi, kete 236 na misokoto 174, mtambo wa kutengenezea gongo pamoja na lita 50 za pombe haramu ya gongo.

SAMATTA APONGEZWA

Waziri wa Habari, Utamaduni, Sanaa na Michezo, Nape Nnauye (katikati) akizungumza na mchezaji wa timu ya TP Mazembe, Mbwana Samatta (kushoto) alipomtembelea ofisini kwake Dar es Salaam jana, kuomba baraka za wizara katika kinyang’anyiro cha kuwania nafasi ya mchezaji bora Afrika anayechezea ligi za ndani na pia kumpa habari za kujiunga na timu ya Genk inayoshiriki Ligi Kuu nchini Ubelgiji. (Picha na Daudi Manongi-WHUSM).

Waziri wa Habari, Utamaduni, Sanaa na Michezo, Nape Nnauye (Katikati) akizungumza na Mchezaji wa TP MAzembe Mbwana Samatta (Kushoto) alipotembelea ofisini kwake jana.

DAR ES SALAAM

SERIKALI imempongeza mshambuliaji wa kimataifa wa Tanzania, Mbwana Samatta kwa juhudi alizoonesha katika kuisaidia timu yake ya TP Mazembe ya Jamhuri ya Kidemokrasia ya Congo (DRC) kutwaa ubingwa wa Afrika, akihimiza Watanzania kumuunga mkono...,

Samatta jana alikwenda ofisini kwa Waziri wa Habari, Utamaduni, Michezo na Sanaa, Nape Nnauye kumuaga tayari kwa safari yake kuelekea Nigeria katika utoaji wa tunzo za wachezaji bora, akiwa ni miongoni mwa wanaowania.

Akizungumza na waandishi wa habari, Nape alisema serikali ipo bega kwa bega na Samatta pamoja na wanamichezo wote, huku akimtakia kila la heri mchezaji huyo katika kinyang’anyiro hicho.

Alisema serikali inapambana ili kuhakikisha wanamichezo wote wanafaidika kutokana na kazi zao na itapambana na wale wote ambao wamekuwa wakila kupitia jasho la wanamichezo.

“Kwa niaba ya serikali, nakupongeza kwa hatua uliofikia, kwani hadi hapo umelitangaza vyema taifa letu, lakini pia hata tuzo ambayo unawania endapo utaitwaa itazidi kukutangaza wewe na pia nchi yetu,” Nape alisema serikali sasa inasimamia vyema maslahi ya wanamichezo wote ili wafaidike na kile ambacho wanakitolea jasho na kwamba lengo ni kuifanya michezo kuwa shughuli rasmi itakayonufaisha wachezaji na taifa.

Naye, Samatta alisema anatambua umuhimu wa mchango wa serikali katika kuchangia mafanikio yake pamoja na soka la Tanzania kwa ujumla na kuongeza kuwa, endapo atafanikiwa kutwaa tuzo hiyo basi haitakuwa ya kwake binafsi bali ni ya taifa zima.
“Kama nitafanikiwa kutwaa tuzo ya mchezaji bora wa Afrika tuzo hiyo haitakuwa ya kwangu peke yangu bali itakuwa ni ya watanzania wote,” alisema.

Alisema, “Kabla ya kwenda sehemu yoyote ile ni lazima upate baraka za wazee ndiyo maana nimekuja hapa kuaga na kuchota baraka za serikali kwa niaba ya Wizara inayohusika na michezo, kabla ya kuelekea Nigeria kuwania tuzo ya mchezaji bora Afrika.”

Samatta pia alimpongeza Nape kwa kuchaguliwa kuwa Mbunge pamoja na kuteuliwa kuwa Waziri wa Wizara ya Habari, Utamaduni, Sanaa na Michezo.

Tuzo za wachezaji bora Afrika zitatolewa nchini Nigeria Januari 7, 2016 ambapo Samatta anawania tuzo hiyo ya mcheaji bora Afrika kwa wachezaji wa ligi za Afrika akiwa pamoja na Bahgdad Bounejah (Etoile du Sahel, Tunisia) Algeria na Robert Kidiaba (TP Mazembe, Congo DR).

KWAHERI KAMANDA KOVA

~~DAR ES SALAAM~~

Leo ni siku ya mwisho kwa Kamanda wa kanda maalum ya Dar es salaam Suleiman Kova, kulitumika jeshi la Polisi nchini kwa kuwa muda wake wa kulifanyia kazi jeshi hilo umeisha...,

Kamanda Kova ametoa taarifa hiyo leo asubuhi alipokuwa akizungumza katika kipindi cha kumekucha cha ITV, na kusema kuwa mkataba wake na jeshi la Polisi umeishia leo, hivyo analazimika kukaa pembeni.

"Mmepata bahati sana, maana wakati nakuja Dar es salaam mwaka 2008 nikitokea Mbeya, kwa mara ya kwanza nilifanya kipindi hapa na leo hii nawaagia hapa, leo ndio siku ya mwisho kwangu kulitumikia jeshi la Polisi, mkataba wangu na jeshi la Polisi unaisha leo, lakini siwaachi hivi hivi, Kaimu wangu yupo atakuwa nanyi", alisema Kamanda Kova.

Kamanda Kova alikuwa Kamanda wa Kanda maalum ya Dar es salaam, na kwa mujibu wake amefanikiwa kupunguza kwa kiasi kikubwa matukio ya kiuhalifu, yaliyokuwa yanaitikisa nchi hususani matukio ya wizi na uvamizi wa kwenye benki.

KUBENEA: SIKUMTUKANA DC MAKONDA

~~DAR ES SALAAM~~

Mbunge wa Ubungo, Saed Kubenea (44) amekana kumtukana Mkuu wa wilaya ya Kinondoni, Paul Makonda tarehe 14 Desemba 2015 walipokutana katika Kiwanda cha Tooku Garments Co. Ltd. kilichopo eneo la External Mabibo kwa madhumuni ya kutatua mgogoro kati ya wafanyakazi na uongozi wa kiwanda hicho......,

Katika kesi inayosikilizwa katika Mahakama ya Hakimu Mkazi ya Kisutu, Wakili wa Serikali mwandamizi, Kishenyi Mutalemwa alimsomea mshtakiwa maelezo ya kesi hiyo ambapo baadhi ya mashtakiwa aliyakana.

Akisomewa maelezo ya kesi, Saed Kubenea alikiri kuwa ni mbunge wa Ubungo na pia alikiri kuwa anamfahamu mlalamikaji katika kesi hiyo kuwa ni Mkuu wa Wilaya ya Kinondoni, Makonda na kwamba ni kweli kuwa tarehe 14 Desemba 2015 alifika katika Kiwanda cha Tooku Garments Co. Ltd kulikokuwa na mgomo wa wafanyakazi.

Hata hivyo, alipoelezwa kuwa anashtakiwa kwa kosa la kumtolea lugha chafu Makonda ambapo alimwita kuwa ni kibaka, mpumbavu, mjinga na cheo chake ni cha kupewa kitendo ambacho kingeweza kusababisha uvunjifu wa amani na utulivu; Saed Kubenea alikana.

Kufuatia Kubenea kukana mashitaka yanayomkabili, Hakimu mkazi mkuu wa mahakama hiyo , Thomas Simba alisema mashahidi sita wa upande wa mashtaka wataanza kutoa ushahidi wao Januari 20 na 21, 2016 katika Mahakama ya Hakimu Mkazi Kisutu.

LIPUMBA AIBUKIA ZANZIBAR..!!

~~DAR ES SALAAM~~

Mwenyekiti wa zamani wa CUF, Profesa Ibrahim Lipumba amesema Rais wa Zanzibar, Dk Ali Mohamed Shein ndiye mtu pekee mwenye uwezo wa kumaliza mgogoro wa Zanzibar.

Akizungumza Dar es Salaam jana, Profesa Lipumba alisema mgogoro wa Zanzibar utamalizwa kwa Dk Shein kuiruhusu Tume ya Uchaguzi wa Zanzibar (ZEC) kutangaza matokeo ya Uchaguzi Mkuu uliofanyika Oktoba 25.

Alisema pamoja na mazungumzo yanayoendelea kati ya CUF na Serikali ya Mapinduzi Zanzibar (SMZ), Dk Shein ndiye mwenye uwezo kuumaliza mgogoro huo.

“Mazungumzo yanaendelea na hatujui yatafika mwisho lini, lakini Dk Shein ndiye anayeweza kuifanya Zanzibar iwe na amani au vurugu, ninashauri aruhusu kutangazwa kwa matokeo,” alisema.

Alisema amani na utulivu uliopo Zanzibar wakati wananchi wakisubiri hatima ya mgogoro huo, haiwezi kuwa ya kudumu kwani ikiamuliwa uchaguzi urudiwe wapo ambao hawatakubali.

Profesa Lipumba alisema uchaguzi wa Zanzibar ulikuwa huru na haki na hata watazamaji wa kimataifa kutoka nchi mbalimbali walishangaa matokeo yake kufutwa.

Alisema wananchi wa Zanzibar walishapiga kura na kwamba wanachosubiri ni matokeo vinginevyo haki yao ya kidemokrasia itakuwa imechezewa.

Oktoba 28 mwaka huu, Mwenyekiti wa ZEC, Jecha Salim Jecha alifuta uchaguzi huo kwa kile alichosema kulikuwa na kasoro ndani ya tume yenyewe na kwenye vituo vya kupigia kura.

Profesa Lipumba alisema mgogoro huo ukiendelea, utakwamisha msaada wa Dola za Marekani 472.8 milioni uliokuwa utolewe na Shirika la Maendeleo ya Milenia (MCC) la Marekani.

Alisema Bodi ya MCC ilikutana Desemba 16 na kushindwa kupitisha msaada huo kwa Tanzania huku hoja kubwa ikiwa kufutwa kwa matokeo ya Uchaguzi Mkuu Zanzibar.

Alisema miongoni mwa matumizi ya msaada huo ilikuwa kuunganisha wateja wapya 300,000 kupata umeme.

“Hapa tunategemea busara za Dk Shein kuumaliza mgogoro ili tupate msaada huo wenye masilahi ya Taifa au kuendelea na mgogoro na kuukosa msaada huo,” alisema.

Akizungumzia suala hilo, Naibu Katibu Mkuu wa CUF (Bara), Magdalena Sakaya alisema huu ni muda mwafaka kwa Dk Shein kuweka masilahi ya Wazanzibari mbele.

Alisema atawekwa kwenye vitabu vya historia kama atafanya uamuzi wa kuruhusu kutangazwa kwa matokeo hata kama viongozi wenzake wa CCM hawatapenda uamuzi huo.

“Lakini vurugu zikitokea, Shein atalaumiwa jumuiya za kimataifa yeye mwenyewe na atashangaa viongozi wenzake wa CCM watakapojiweka pembeni,” alisema.